РУСКИ КЕРЕСТУР – Потим як одпатрели представу „Нєлапшни Алибаба”, за коло 200 дзеци хтори пришли зоз скоро наших местох, у Велькей сали Дому култури школяре нїзших класох домашнєй Основней школи „Петро Кузмяк” виведли културно-уметнїцку програму.
Полну салу дзецох и їх учительки, хтори пришли на Мемориял зоз школох дзе ше виучує руски язик порядно лєбо як виборни предмет, привитала директорка домашнєй Школи Хелена Пашо Павлович, хтора их у нєпоштредней комуникациї мотивовала же би ше одшмелєли бешедовац по руски.
Потим кратку програму виведли школяре на хторей шпивали, рецитовали и грали, а на концу виведли и кратки виривок з представи „Цифровани яблука”. На концу школяре другей класи одшпивали два шпиванки до хторей ше уключела и публика.
Зоз Дому култури школяре-госци пошли до єдальнї домашнєй школи хтора им обезпечела ужину и окрипенє.
За тоту нащиву Мемориялу, орґанизатор Дом култури им обезпечел уходнїци, а наш Национални совит прейґ Одбору за образованє финансовал їх приход до Керестура. Домашнї госцом прето були и предсидатель Вивершного одбору НС Руснацох Желько Ковач и предсидателька Одбору за образованє Мелания Римар.