ВЕРБАС – И у Вербаше ше того тижня отримує Дзецински тидзень, чиї тогорочни мото „Мойо право же бим жил щешлїво и здраво – роснуц без насилства”.
Манифестацию ше отримує пре обрацаня уваги явносци на дзеци и младих, на потреби и права дзецох и младих у фамелиї, дружтву и локалней заєднїци, на єднаки шанси за розвой и витворйованє шицких своїх потенциялох.
З нагоди Дзецинского тижня отворени подобово и литературни конкурси з тему „Мойо право же бим жил щешлїво и здраво”, а роботи ше посила Културному центру Вербас и Народней библиотеки „Данило Киш”.
Тота установа под час Дзецинского тижня окончує и безплатни упис дзецох до Библиотеки, а Центер за физичну културу „Драґо Йовович” оможлїви дзецом безплатни уход на жимски базен през тидзень од 19 по 22 годзин, и за викенд од 12 по 19 годзин.
Пондзелок, 1. октобра, на централней Площи Никола Пашич, ЯКП „Комуналєц” отримало еколоґийну роботню за предшколцох, у биоскопе того дня отримана дзецинска представа, алє и аудиция з назву „Сцем повесц” за дзеци основних школох у рамикох проєкту Здруженя гражданох „Горизонт”.
Манифестация будзе тирвац по 7. октобер, а означує ше у шицких дзевец основних школох у општини, як и шицких обєктох Предшколскей установи „Бошко Буха”.