БЕОҐРАД – З проєктом „Звекшанє нагоди за обезпечованє роботи сезонским роботнїком”, хтори подписани вчера у Влади Сербиї, держава планує оможлївиц анґажованє и младих од 15 по 18 роки за сезонски роботи у польопривреди, без огляду чи ше находза на евиденциї Националней служби за обезпечованє роботи, як и одредзиц суму порциї за роботодавательох хтори их анґажую.
На тот способ, гварене на подписованю Меморандума медзи НАЛЕД-ом, Нємецку розвойну аґенцию и ресорнима министерствами, ефекти того проєкта буду обачлїви у наиходзацим периодзе.
Єдна з перших активносцох будзе виробок закона и запровадзованє механїзма за поєдноставене обезпечованє роботи, лєгчейше плаценє порциї и доприносох за сезонцох. Ресорни министерства по потреби формую Роботне цело хторе будзе координовац активносци институцийох у применьованю закона.
Нємецка розвойна индустрия и НАЛЕД даю финансийну и фахову потримовку при вирабяню софтверского ришеня за поєдноставену прияву по углядзе на модел хтори ше хаснує у Мадярскей.
План Нємецкей аґенциї и НАЛЕД-а же би направели реґистер сезонских роботнїкох у хторим буду идентификовани схопносци роботнїкох.
У Сербиї єст коло 100 000 сезонски роботнїки у польопривреди хтори робя у шивей зони, а коло 65 одсто у 2016. року робели без контракту.
Тот закон би мал буц прилапени по конєц рока, а ришеня хтори ше прави за роботнїкох у польопривреди годни буц применєни и на други конари привреди як цо будовательство, погосцительство и туризем.