Ревиялна програма коруна „Коцурскей жатви”

автор злк
879 Опатрене

КОЦУР – Тогорочна манифестация жридловей фолклорней творчосци Руснацох „Коцурска жатва” закончена всоботу, 14. юлия, зоз Централну манифестацию.

Богата програма и красна хвиля оможлївели публики же би уживала провадзацих програмох котри з часци були на отвореним, и у централней котра отримана у велькей сали у Доме култури.  

Централна часц програми Фестивалу почала зоз интонованьом гимни Републики Сербиї „Боже правди” и руску шветочну шпиванку „Браца Русини”, а потим шицких присутних привитали предсидатель Вивершного одбору Националного совиту (НС) Руснацох Желько Ковач и предсидатель Општини Вербас Милан Ґлушац.

Фестивалска часц почала зоз наступом дзецинскей домашнєй ґрупи КУД „Жатва” и шпиванками „Жатвовей” женскей шпивацкей ґрупи, а потим ше шоровали танци КПД „Иван Котляревски” зоз Бикич Долу, КУД „Петро Кузмяк” зоз Нового Орахова, КУД „Яким Ґовля” зоз Миклошевцох, КУД „Тарас Шевченко” зоз Дюрдьова, РКЦ Нови Сад, КУД „Дюра Киш” зоз Шиду, КУД „Завичайне врело” зоз Коцура, Пририхтуюца ґрупа Дома култури зоз Руского Керестура, а програму заварли домашнї танцоше КУД „Жатва”. 

Окрем предсидателя Општини Вербас Милана Ґлушца и предсидателя Вивершного одбору НС Руснацох Желька Ковача, Централну програму на тогорочним фестивалу жридлового фолклору зоз публики провадзели и Олена Папуґа посланїца у Народней скупштини Републики Сербиї, Мартица Тамаш заменїца предсидательки Скупштини општини Вербас, представителє покраїнскей власци, предсидатель Совиту Месней заєднїци Коцур Желько Бєлан, представнїца Руснацох у Бараньско-Осєцкей жупаниї Агнетка Балантинац, о. д. помоцнїка покраїнского секретара за туризем и реґионално-привредне сотруднїцтво Серґей Тамаш, предсидатель Союзу Руснацох Українцох Сербиї Боґдан Виславски, представитель Заводу за културу войводянских Руснацох Миломир Шайтош, панї Людмила Шандалова зоз Словацкей, як и представителє наших установох, институцийох, медийох, роботних целох, уметнїцких дружтвох и други.

Водителє цаловечаршей програми були Емилия Ружич и Стеван Самочета.

По завераню фестивалу друженє учашнїкох и публики предлужене у Пелетовей сали зоз оркестром у котрим грали музичаре зоз вецей наших местох.

Отримованє манифестациї жридловей фолклорней творчосци Руснацох „Коцурска жатва” потримали и финансийно помогли Општина Вербас, Амбасада України у Беоґрадзе, Покраїнски секретарият за културу, явне информованє и одношеня зоз вирскима заєднїцами, НС Руснацох, Завод за културу войводянских Руснацох, Покраїнски секретарият за образованє, предписаня, управу, национални меншини-национални заєднїци, як и привреднїки и приятелє фестивалу „Либела продукт”, Бензинска пумпа „Тутнєвич” и ЗЗ „Клас”.

Вецей фотоґрафиї зоз тей манифестациї обявени на нашим сайту у фотоґалериї.

ПОВЯЗАНИ ТЕКСТИ