РУСКИ КЕРЕСТУР – На основи прелиминарних резултатох Закончуюцого испиту, мали матуранти рускокерестурскей Основней школи „Петро Кузмяк” з руского язика и математики посцигли дакус лєпши успих як влонї, а вельо слабши з комбинованого тесту, хтори слабше виробели школяре у цалей Сербиї. По чаше за жалби, конєчни резултати буду обявени 23. юния.
Як Рутенпрес дознава у керестурскей Школи, зоз двацец задаткох на каждим тесту (максимално на каждим могло освоїц 20 боди), з руского язика штреднє посцигнути 8,12 боди, а влонї то було 8,08. З математики тераз штреднє посцигнути 6,92 боди, док лоньски просек бул 6,50, а з комбинованого тесту з пейц предметох тогорочни просек бодох 7,94, а влонї бул 9,00.
Поєдинєчно, з руского язика найвецей посцигнути 18, з математики 19, а з комбинованого тесту 16,5 боди. На шицких трох тестох єден школяр мал вєдно 50 зоз 60 можлївих бодох.
У Школи – од школярох, родичох по наставнїкох руского язика и директорку – барз нєзадовольни же з руского язика нє було задатки у хторих могло достац и по пол бода, гоч су предвидзени у таблїчки за кажди з трох тестох. Таку можлївосц вихасновали составяче задаткох на других язикох, окрем з нашого руского, цо у Школи тримаю як нєсправедлїве и же руски школяре, у одношеню на шицких других, з тим очкодовани.
Як за „Рутенпрес” виявела директорка Школи Хелана Пашо Павлович, проблем знова будзе винєшени на Одборе за образованє Националного совиту (НС) Руснацох, а здогадла же шицки три нашо школи з порядну наставу на руским язику и влонї прейґ того одбору НС, хтори их потримал, пробовали уплївовац на тот проблем, алє резултати нєт. Як гварела наставнїца руского язика Ксения Шовш, зоз школох єдино прилапени зауваги же задатки того року були прилагодзенши школяром и яснєйше поставени.