Талантовани фодбалер Деян Югик з Руского Керестура од шейсцох рокох бави фодбал, а свойо перши крочаї у тим спорту научел у „Русину”. Од теди пременєл три клуби, а тераз ше рихта пойсц бавиц до Мадярскей и наздава ше же ше му то и витвори. Пре фодбал менял и школи, та у Керестуре закончел першу и штварту класу Ґимназиї, а другу и трецу у Новим Садзе.

Кед пред трома роками робени з тобу интервю за МАК, бавел ши за ОФК „Кула” у Новим Садзе. Дзе тераз тренираш?

Деян Югик: Бавел сом ище у Тополї у клубу „ТСЦ”, а тераз сом у ОФК „Оджак” у Кули. Углавним бавим у штредку, як вязни бавяч, и на тей позициї сом одмалючка.

У хторим клубе ци було найлєпше и прецо?

ДЮ: Кажди клуб ма свою приповедку, та нє можем видвоїц анї єден.

Дзе ходзице на змаганя и як часто маце тренинґи?

ДЮ: Остатнє змаганє сом мал у Панчеве, а тераз будземе бавиц у Кули. Змаганя маме кажди тидзень, а часто два раз до тижня, док тренинґи маме кажди дзень. Вец ище и дома тренирам индивидуално, минимално по два годзини.

Мал ши дакеди даяки покалїченя?

ДЮ: На щесце, нїґда сом ше озбильнєйше нє покалїчел.

Як то же ши достал нагоду пойсц бавиц до Мадярскей?

ДЮ: Сцем цо скорей оталь сцекнуц и почац бавиц даґдзе у иножемстве. Затераз ми циль пойсц до Мадярскей. Єден чловек зоз Бечею ме видзел на єдним змаганю и после того ми направел CV, видео, и тераз, концом априла, тото ма буц послате до 200 клубох, та ше можебуц даєден заинтересує. Бул сом уж на проби у Мадярскей у клубе „Мако”, то треца лиґа, и вони ше за мнє заинтересовали, алє ше ми остатнї дзень закомпликовало цошка коло паперох, та ме нє могли реґистровац, так же сом ше врацел до клубу „Оджак”. Алє, сцу же бим  на лєто пошол заш. И „Войводина” ше тераз заинтересовала за мнє, та ище увидзим же цо и як будзе.

Ище вше ци идол Роналдиньо?

ДЮ: Гей, то ше нє пременєло.

Теди ши гварел же биш любел бавиц и за репрезентацию Сербиї. Чи ище вше так думаш?

ДЮ: Дакус сом ше предумал, прето же сом досц того прежил, та ми тераз циль пойсц до иножемства.

Чи ши ше дараз пре дацо у тим спорту розчаровал ?

ДЮ: Барз сом самокритични, та кед даєдно змаганє слабше одбавим, розчаруєм ше, алє ше вец баржей намагам и пририхтуєм за шлїдуюце змаганє.

Од чого ши ше мушел одрекнуц пре фодбал?

ДЮ: Мушел сом одроснуц скорей як мойо товарише, прето же сом на 15 роки пошол до Нового Саду бориц ше за себе. А мушел сом ше одрекнуц и виходох, алє пре тото нє бануєм. 

За хтори клуб навияш?

ДЮ: За „Партизан”.

Тренирал ши ище даєден спорт окрем фодбалу?

ДЮ: Дакус столни-тенис, а и у атлетики сом ше опробовал.

Як ше чувствуєш кед даш ґол?

ДЮ: Такой сом задовольнєйши и то ме мотивує же бим далєй робел и борел ше.

Хто ци найвекша потримовка?

ДЮ: Моя фамелия, без нїх би ше ми нїч нє удало. Алє и шицки хтори ме потримую, прето же я без фодбалу нє можем задумац анї дзень. Фодбал то любов!

(МАК 4/2018)