ВЕРБАС – Роботи на старовербаскей парохиї Покрова Пресвятей Богородици почали у юнию, а очекує ше же буду закончени у наиходзацих тижньох.
Єдна з перших вельких роботох було менянє закрица на церкви, а потим и громобрана и поставянє двоїх вирезбарених дзверох з дубового древа.
Хвильково ше ище у двох фазох роби вонкашнє ошвиценє церкви и билї ше вонкашньосц церкви. Уж два тижнї роботи на новей фасади окончує майстор Свен Парацки, а средства достати з благословом нашого преосвященого владики кир Георгия Джуджара зоз католїцкей орґанизациї, односно надбискупиї зоз Келну, з Нємецкей.
И попри тим, активносци у старовербаскей церкви ше порядно одвивали, та 30. септембра було пошвецанє школярских ташкох. До церкви пришли скоро 30-еро дзеци, а медзи нїма було найвецей гевтих основношколского возросту, алє и стредньошколцох, та и єден студент. Парох о. Алексий Гудак школярски ташки пошвецел после Служби Божей, и з тей нагоди им пожадал успишни нови школски рок.
