СВИДНЇК (СЛОВАЦКА) – У орґанизациї Роботного цела за младеж Националного совиту (НС) Руснацох, ґрупа младих Руснацох од 26. по 29. май була на екскурзиї у Словацкей, цо источашнє була и награда нашим младим активистом у рускей заєднїци.
На екскурзиї були дзевецеро млади з Руского Керестура, Коцура, Дюрдьова, Нового Саду и Нового Орахова и штверо члени Роботного цела за младеж – Соня Гудак, Иван Канюх (Нови Сад), Ясна Медєши (Керестур), Далибор Болдиш (Шид) и його предсидатель Саша Сабадош (Зомбор), а у Свиднїку ше им приключел и єден млади Керестурец котри тераз жиє и роби у Братислави.
На Горнїци у Словацкей млади нащивели Кошице, були госци на Фестивалє русинскей култури у Свиднїку, у Медзилаборцох нащивели Музей модерней уметносци пошвецени Ендийови Варголови, Крайови музей у Прешове, як и город под защиту УНЕСКО-а Бардейов.
На Русинским фестивалє у Свиднїку делеґация младих зоз Сербиї ше урядово стретла з членми Здруженя „Млади Русини” зоз Словацкей, дзе вичерали искуства и идеї вязани за роботу младих и з младима, так же то будзе основа за будуци сотруднїцтва и можлїви заєднїцки проєкти младих.
Витворенє екскурзиї наших младих до Словацкей потримал НС Руснацох, хтори обезпечел часц финансийних средствох и комби-превозку за путованє.