Музични албум „Еротика Рутеника” проєкт Руского културного центру (РКЦ) з Нового Саду, а на нїм ше находза дзевец руски народни, бетярски шпиванки, обробени на сучасни способ, хтори були виведзени на прешлорочним вечаре „Дзе(нь) младосц(и)?” у РКЦ.

Зоз трецей, музичней часци того вечара, обробени народни шпиванки тераз и зняти, же би були тирвацо зазначени на музичним албуму. Танита Ходак, Александра Колбас и Саня Дивлякович их виведли на тей програми, як и на албуме.

– Шпиванки бетярски, и тот вечар хтори отримани у Матки почал розбивац табуи, бо без огляду же жиєме у 21. вику, ище вше єст якеш чувство ганьби, та аж и у музики. Зна ше же хто грає таки шпиванки, кеди и дзе ше их грає, а ми то сцели дакус пременїц. Сцели зме повесц же их шицки любиме послухац, там на концу вешеля, алє гайде же бизме их положели и „на шветло”. Идея була же би ше тоти шпиванки нє забуло, а то би ше случело кед би ше их нє зняло – гвари Саня Дивлякович, єдна зоз шпивачкох и реализаторкох програми и додава же младши ґенерациї треба же би знали же постоя и таки шпиванки, и же би мали ширшу слику о рускей музики, же вона фина, нїжна и родолюбива, алє тиж так, зна буц и еротична.

– То нє „ґадни” шпиванки од хторих треба же бизме ше ганьбели, їх хтошка дзешка написал, видумал мелодиї и нє треба их одруциц до кута, алє их прилапиц, як и шицки други шпиванки – визначує Саня.

Музични состав на албуме творя и музичаре – Мирослав Пап, хтори грал на ґитари, а хтори тиж так поробел и обробки шицких шпиванкох, Мирон Сивч на гармоники, Мирослав Фейди на кларинету, Єлена Ґудураш на виолини и Александар Човс на басу.

Еротика нє порноґрафия, вона цошка цалком друге. То страсц, з ню ше наглашує и указує чувства, то часц любови. Таки писнї наставали у иншаких часох, теди велї ствари були нєприлаплїви за явносц. Можебуц ше прето шлєбода бетярского виражованя пренашла праве у таких шпиванкох. Шпиванки за албум зняти у студию у Новим Садзе, дзекуюци средством и помоци Роботного цела за младеж Националного совиту Руснацох. Тот музични албум обявени на интернет боку часописа МАК, же би бул доступни ширшей явносци.

– Тоти еротични шпиванки ше у сущносци нє видвоюю по музики, або дачим, од других шпиванкох, велькей розлики нєт. Лєм даєдно словко, або контекст ше нагадує як еротични. Мам упечаток, як дахто хто длуго шпива на наших руских фестивалох, же сом за тоти роки нє мала нагоду анї шпивац, алє анї чуц бетярску шпиванку. Нєшкайши писнї фини, споминаю ше чувства любови, поля, ровнїна… а нє маме бетярски франтовлїви шпиванки – припознава Саня.

Вечар „Еротика Рутеника”, вєдно зоз Саню, обдумала и Александра Живкович Бучко и вона толкує же векшину писньох вибрали зоз кнїжки „Еротика Рутеника”, по записох Володимира Гнатюка, а даєдни тексти присподобели нєшкайшому шпиваню. Тиж так, даєдни шпиванки им предложели и нашо гудаци, а при прилагодзованю текстох за знїманє албума консултовали ше и з даєднима фаховцами. Шпиванка „Шалєна я була” превжата зоз ґрамофонскей плочи Янки Ґузовей зоз шейдзешатих рокох.

– Таки, еротични писнї, першираз зняти на сучасни способ. А ми у Матки ше намагаме направиц цо интересантнєйши подїї и промововац вецей файти уметносци младих Руснацох. Наиходзели зме на рижни критики за прешлорочну програму, и позитивни и неґативни, алє якош, шицким було цикаве и була барз нащивена – гвари Александра.

Композициї з музичного албума „Еротика Рутеника” слухайце, лєбо их себе безплатно знєйце на МАК-овим интернет боку https://makmagazine.bandcamp.com/, односно на сайту www.ruskeslovo.com → МАК → МАК CD. Осторожно слухайце, можебуц аж тераз похопице двосмисловосц даєдних текстох, хтори сце чули и скорей.

Виривки текстох зоз шпиванкох з албума:

Янчи

Янчи, Янчи, Янчи, Янчи,

Цо ши робел нашей Ганьчи,

Наша Ганьча була хора,

Вчера була у дохтора.

Ишол когут

Шедза людзе при пецику грею ше,

патра себе медзи ножки шмею ше.

Ша ми ище слава Богу,слава Богу нє стари,

ище ше нам кеди теди побави.

Служела я у попа 

Єдну ногу подзвигнєш

а другу прицишнєш

основа ше розшири

а чолнок ше дрилї.

Макаї, Макаї

Макаї, Макаї,

Крашнє подштригани

Я го барз любела

Бо бул вше прибрани.

А я себе порадзим

А я себе порадзим, порадзим, порадзим,

Квочку себе насадзим, насадзим, насадзим,

А курчата попре…, попре…, попредам,

Фраєрови пирко дам.

Мили, мили, цо биш робел

И дала му да, и дала му да, и дала му винка з погара.

И дала му да, и дала му да, и дала му шицко цо сцела.

Яй, Ганїчко   

Яй, Ганїчко, цо то маш

Яй, яй, яй, яй, яй

Цо з фартущком прикриваш

Яй, яй, яй, яй, яй

Ицом пицом бул сом з пицом

Сукнїчка червена аж повисше колєна.

Под стреху

Нє прешло то тому тидзень, два,

млада жена иншак поведла.

Пошол мой наймилши зоз краю, зоз краю,

а ти придз на вечар шугаю.

Шалєна я була

Дай ми мила, дай ми, три раз до пол ноци.

Шей, гой, же би нашо дзеци, мали чарни очи.

Фото: Андреа Новак