РУСКИ КЕРЕСТУР – У Руским Керестуре прешлого тижня окончене розвоженє велького количества глїни на Новим населєню зоз хтору загаргнути пайпи на концу улїци Лоле Рибара и на долїну од Роботнїцкей улїци.
Тота глїна зоз вичисценей атмосферскей канализациї, одн. велького ярку у тей часци валала, цо окончене прешлей єшенї. По словох директора ЯКП „Руском” Иґора Фейдия, так ше и з каждим шлїдуюцим копаньом яркох предлужи давно плановане завоженє долїнох у валалє.
Тих дньох розобрана и лєтня заграда „башта” у центру у Русинскей улїци опрез погосцительного обєкту „Код Чава” одн. дакедишнєй Мензи та розришене затримованє води на паркинґу. Кед падали вельки дижджи вода ше затримовала пре нєотримовани одвод под влонї поставену лєтню заграду спред того обєкту. Инспекция на вецей заводи опоминала власнїка же би тото ришел, а понеже вон то нє отримовал и так нєпочитовал контракт за отримованє одводу, мал даскельо опомнуца, а тераз достал налог за розберанє тей лєтнєй загради цо и поробене гевтого тижня — гварел директор „Рускому” Иґор Фейди.
