Розличносци нас злучую

автор т. салаґ
917 Опатрене

ШАЙКАШ – У Шайкашу, пияток 30. новембра, у Основней школи ,,Исидора Секулич” отримани Дзень националних меншинох, манифестация под назву ,,Розличносци нас злучую”. Участвовали дзеци зоз Шайкашу, Будисави, Тителю и Дюрдьова котри зоз рижнима точками представели свою народну културу.

Циль тей подїї бул же би ше дзеци, конкретно зоз Шайкашу котри углавним Серби, упознали зоз припаднїками других народох котри жию у  нашим стредку.

– Маме даяки лекциї зоз историї у котрих же учи о других народох котри жию у Войводини, и так колеґиня и я похопели же як дзеци барз мало знаю о других народох котри жию у нашим стредку и дошли зме на идею орґанизовац тоту манифестацию – гварела єдна зоз орґанизаторкох и наставнїца историї Ранка Салонски.

На тим вечаре ше представели Руснаци зоз Дюрдьова, дзеци старшей дзецинскей фолклорней ґрупи зоз КУД-а ,,Тарас Шевченко”, Мадяре зоз Будисави, Словаци зоз Тителю и Роми зоз Шайкашу, алє и домашнї Серби зоз Войводини, и Босанци котри ше доселєли.

– Ми ше представели зоз двома танцами, зоз Руским танцом и Коломийку. Було нам барз фино, задовольни зме, чули зме и видзели дацо нове о других народох котри ту жию. То єдно нове искуство за нас и наздаваме ше же ше будзе орґанизовац и нарок, же знова придземе и же наставиме тото сотруднїцтво. На концу програми було орґанизоване єдно бависко, асоцияция, у котрей шицки зоз публики, а и учашнїки могли участвовац, дзе зме тиж могли научиц дацо нове. После шицкого, була орґанизована закуска и друженє, дзе зме могли видзиц и покоштовац рижни єдзеня других народох, а дзе, медзи иншим, були и нашо єдзеня, як цо то бобальки, геровци, сирец – гваря о упечаткох зоз тей красней подїї дзеци зоз старшей дзецинскей фолклорней ґрупи КУД-а ,,Тарас Шевченко” зоз Дюрдьова.

ПОВЯЗАНИ ТЕКСТИ