НОВИ САД – Покраїнски секретарият за образованє, предписаня, управу и национални меншини-национални заєднїци пондзелок, 6. фебруара розписал штири конкурси з обласци витворйованя правох националних меншинох у Войводини. За конкурси з буджету АПВ вєдно опредзелєни 56 милиони 38 700 динари, а шицки конкурси тирваю по 3. марец.
Мож конкуровац за дотациї орґанизацийом етнїчних заєднїцох – за порядну дїлносц, проєкти, орґанизованє манифестацийох, набавянє опреми и рижни други укладаня. Цалосна сума за тот конкурс 29 милиони 950 000 динари и розпоредзує ше ю по националних заєднїцох.
На конкурс за софинансованє проєктох за очуванє и пестованє медзинационалней толеранциї мож конкуровац зоз шицкима формами медийней активносци, публикациями нєпрофитного характеру, за орґанизованє семинарох и других едукативних сходох, а за тоти намени опредзелєни 14 милиони 688 700 динари.
За унапредзованє витворйованя правох на службене хаснованє язикох и писмох националних меншинох-националних заєднїцох у АПВ на окремним конкурсу опредзелєни 9,5 милиони динари.
Штварти конкурс ше одноши на предлуженє проєкту „Декада инклузиї Ромох”, розписани є на суму од 1,9 милиони динари, а мож конкуровац з програмами за очуванє и пестованє националного и културного идентитету припаднїкох ромскей националней меншини.
Конкурсну документацию мож превжац у просторийох горе спомнутого секретарияту, а доступна є и на сайту Секретарияту – www.puma.vojvodina.gov.rs.
Резултати конкурсох буду обявени на горе спомнутей веб-адреси.