Розписани штири конкурси з обласци информованя

автор зам
952 Опатрене

НОВИ САД – Покраїнски секретарият за културу, явне информованє и одношеня з вирскима заєднїцами 1. марца розписал штири конкурси за финансованє проєктох з обласци явного информованя у тим року. Конкурси тирваю по 31. марец, а на нїх нє можу конкуровац явни медийни сервиси и медиї, односно їх снователє, хтори доставаю порядну субвенцию з републичного, лєбо покраїнского буджету.

За софинансованє проєктох за продукцию медийних змистох на сербским язику опредзелєни 46 милиони динари (43 за приватни подприємства, а 3 милиони за нєвладово орґанизациї), а за медийни змисти на язикох националних меншинох 6 милиони 200 000 динари, дзе за приватни подприємства 4,2 милиони, а за нєвладово орґанизациї 200 000 динари.

Мож конкуровац и з проєктами за унапредзенє професийних стандардох, цо ше одноши на софинансованє орґанизованя, лєбо участвованя на фахових сходох, на едукованє занятих у медийох, на софинансованє медийних фестивалох и явних розправох вязаних за медийни реґулативи. За тот конкурс опредзелєни вєдно милион и пол динари.

За конкурс наменєни медийом хтори информую на знаковним писму, Брайовим писму, лєбо на даяки други способ опредзелєни 2,5 милиони динари, док на конкурсу за стимулованє явного информованя на сербским язику у жемох у окруженю опредзелєни 6 милиони динари.

Шицки конкурси обявени на сайту спомнутого секретарияту – www.kultura.vojvodina.gov.rs дзе и потребни податки за конкурованє.

ПОВЯЗАНИ ТЕКСТИ