Розподзелєни пенєж по конкурсу Одбору за културу Националного совиту

автор саб  фото вев
1.4k Опатрене

НОВИ САД – Порядна, штварта схадзка Одбору за културу Националного совиту (НС) Руснацох, на хторей розподзелєни средства по Конкурсу за софинансованє програмох и проєктох у обласци защити нєматериялного културного нашлїдства и уметнїцкей творчосци Руснацох, отримана вчера, 26. мая у Заводзе за културу войводянских Руснацох у Новим Садзе.

Конкурс бул наменєни нашим КУД-ом и здруженьом за програми роботи секцийох, у фебруаре го розписал НС Руснацох, а прияви тирвали по 17. април. Цали буджет конкурса бул милион и пол динари, дзе по 300 000 розподзелєни на пейц обласци културней дїялносци за хтори маме и окремни фестивали – хорске шпиванє, фолклорна творчосц, народни и тамбурово оркестри, жридлове шпиванє и театрална творчосц.

На конкурс з обласци хорского шпиваня сцигли три проєкти, так же Хор „Гармония” з Нового Саду и Хор КПД „Карпати” з Вербасу достали по 85 000 динари, а Здруженє „Руснаци” зоз Сримскей Митровици 45 000. Нєрозподзелєни остали 85 000 динари.

З обласци фолклору конкуровали шейсц дружтва – Руски културни центер з Нового Саду, КПД „Карпати” з Вербасу, КУД „Тарас Шевченко” з Дюрдьова, КУД „Жатва” з  Коцура, КПД „Иван Котляревски” з Бикичу и КУД „Петро Кузмяк” з Нового Орахова, дзе кажде достало по 50 000 динари.

Седем дружтва – спомнути з Нового Саду, Вербасу, Дюрдьова, Коцура, Нового Орахова и Сримскей Митровици, як и КПД „Дюра Киш” зоз Шиду, конкуровали з проєктами за оркестри. Крем Митровчаньох, хтори лєм починаю робиц и достали 12 000 динари, шицки спомнути за тоту обласц достали по 48 000 динари.

Найвецей проєкти – аж 10, сцигли за обласц жридлового шпиваня, та дружтва з Нового Саду, Шиду и Дюрдьова, хтори маю по вецей ґрупи, достали по 40 000, а з Вербасу, Коцура, Кули, Бикичу, Суботици и Нового Орахово по 30 000 динари. У тей обласци Одбор нє додзелєл средства Здруженю „Руснаци” зоз Сримскей Митровици, понеже проєкт исти як за хорске шпиванє, а подрозумює и лєм снованє женскей жридловей ґрупи.

3-Odbor-02

У обласци театру з дзецинскима представами конкуровали КУД „Тарас Шевченко” з Дюрдьова и Руске КУД „Др Гавриїл Костельник” з Кули, а РКЦ Нови Сад з представу за одроснутих.

Понеже по Конкурсу по 150 000 динари наменєни за дзецински, односно представи за одроснутих, обидва приявени проєкти дзецинских представох достаню по 30 000, а новосадска представа за одроснутих 80 000 динари.

Як порядзене на схадзки, остаток од 90 000 динари за дзецински представи будзе подзелєни по новим конкурсу на єшень, з намаганьом же би ше на ньго приявели цо вецей нашо КУД-и, школи, здруженя и поєдинци. Як нєрозподзелєни остали 70 000 динари за представи за старших.

Схадзку водзела предсидателька Одбору за културу Ґабриєла Саянкович, а присуствовали 9 зоз 14 членох Одбору.

 

 

ПОВЯЗАНИ ТЕКСТИ