РУСКИ КЕРЕСТУР/ЗОМБОР – Розправа о Напредок пририхтаним планє реорґанизациї „АБЦ ФУД” у Привредним судзе у Зомборе, хтора була заказана за 17. октобер, одложена за 1. децембер того року.
Одкладанє розправи знова вимагала управа „АБЦ ФУД” и дополнююци час за розпатранє процесних документох, понеже єдна банка-поверитель ище вше нє доручела цалосну документацию.
Тиж так, потребни условия за отверанє розправи и розпатранє придатих заувагох нє були витворени и з боку поверительох бо, медзи иншим, нє бул присутни судски толмач за руски язик, цо вимагала адвокатка поверительох з Руского Керестура Мария Йоксович. Од поверительох котрих заступа Йоксовичова вовторок нїхто нє бул на розправи.
Як дознава Рутенпрес, Здруженє паприґарох Руского Керестура планує орґанизовано пойсц на розправу 1. децембра, же би судийка голєм часточно мала представу о вельким чишлє поверительох.