Рочна Виберанкова скупштина ШК „Омладинєц”

автор злк
751 Опатрене

КОЦУР – Внєдзелю, 19. марца, Шаховски клуб (ШК) „Омладинєц” у своїх просторийох отримал Рочну, источашнє и Виберанкову скупштину, а по схадзки  отримани и турнир у шаху.

Предсидатель ШК Янко Бесерминї винєсол финансийни и звит о роботи Клубу у прешлим року, дзе визначел же, после длугшого часу, финансиї Клубу стабилни и коцурским шахистом одобрени средства за отримованє Мемориялного турниру и турниру у шаху у рамикох СБ „Яша Баков”. Представени и план роботи за тот рок, у хторим приоритет будзе порушованє дзецинскей шаховскей секциї.

Понеже старому руководству вишол мандат, на схадзки на нови мандат знова вибрани дотерашнї руководителє Клубу – за предсидателя Янко Бесерминї, подпредсидателя Милован Паунович, секретара Дюра Фейса, за касира Миряна Шолая и за капитена екипи Споменко Павичевич.

Попри спомнутих, до Управного одбору вибрани и Онуфри Макаї и Миле Радакович, а до Надпатраюцого одбору Микола Тамаш, Миле Дражич и Здравко Штрбац.

По законченю схадзки отримани турнир у шаху, на хторим участвовали 19 шахисти з Коцура и околїска. Бавело ше 7 кола по швайцарскей системи, перше место освоєл Никола Тадич з Вербасу, друге Ґабор Фейса з Коцура, а треце Владимир Лазор з Кули.

ПОВЯЗАНИ ТЕКСТИ