о РУСКИ КЕРЕСТУР – Тогорочни 56. Фестивал рускей култури „Червена ружа” будзе отримани два, а нє три днї як то на перши завод було плановане и яка була пракса скорейши роки, одлучене на вчерайшей заєднїцкей схадзки Орґанизацийного и Програмного одбору Фестивалу, хтора отримана у рускокерестурским Доме култури.
До скрацованя дньох Фестивалу пришло насампредз пре менше число учашнїкох у традицийним змаганю младих шпивачох за найкрасши глас, так же тота манифестация будзе на пияток, 30. юния вечар, у рамикох, односно на початку програми „Одгуки ровнїни”.
Фестивал „Червена ружа” того року будзе пияток и соботу – 30. юния и 1. юлия, на отвореней сцени у дворе Школи „Петро Кузмяк” у Руским Керестуре, а вчера утвердзени и скоро шицки точки манифестацийох Фестивалу.
Як и дотераз, „Ружа” пияток пополадню почнє з отвераньом вистави, того року подобових роботох зоз шветово познатей Ґалериї наївней уметносци з Ковачици. Орґанизованє тей вистави будзе витворене на основи спорозуменя о сотруднїцтва войводянских заводох за културу у рамикох проєкту „Карпатски паралели”, а вистава будзе у голу Спортскей гали.
На пияток, 30. юния, буду ище два манифестациї – на 17 годзин програма дзецох „Червене пупче”, а на 20,30 годзин наступ руских ансамблох „Одгуки ровнїни”. У першей часци „Одгукох” будзе змаганє младих шпивачох з наших местох за найкрасши дзивоцки и леґиньски глас, а побиднїки буду преглашени на концу тей програми, на хторей участвую шпивацко-танєчни ґрупи шицких наших КУД-ох хтори пестую тоту творчосц.
На соботу, 1. юлия будзе Шветочни концерт (на 21 годзин), на хторим госц Поддуклянски уметнїцки народни ансамбл (ПУНА) з Прешова, зоз Словацкей, а пред ПУНУ наступя Мишаних хор Дому култури Руски Керестур и Катедралней церкви св. о. Миколая з Керестура, Хор „Гармония” з Нового Саду, Виводзацки танєчни ансамбл керестурского Дому култури, як и танєчно-музични ансамбл КУД „Сербия” з Кули.
У дворе Школи, у часци и просторе за розвагу под час „Ружи”, дзе буду и шатри, после Шветочного концерту госцох на соботу будзе забавяц познати Тамбурови оркестер „Равница” зоз Суботици.
Як провадзаци програми, на соботу буду отримани два збуваня – Керестурски саям у Майсторским доме, хтори вєдно орґанизую два домашнї здруженя – ремеселнїкох и приватних поднїмательох и „Байка”, а у Спортскей гали Медзинародни турнир у одбойки, у рамикох Спортских бавискох „Яша Баков”. У орґанизациї Турниру участвує и Месна заєднїца Руски Керестур, а и Саям и Турнир почню на 10 годзин.
На нєдзелю, 2. юлия, ПУНА цаловечарши концерт отрима у Новим Садзе, найвироятнєйше у дакедишнїм Театру младих, нєшкайшим Доме култури (прейґ будинку Радио Нового Саду), а термин того концерту будзе познати познєйше.
