Рукометаше закончели сезону на штвартим месце

автор мар
1k Опатрене

РИДЇЦА – Остатнї рукометни турнир у рамикох Лиґи младших катеґорийох м14, одбавени у Ридїци, 5. мая, спортисти Рукометного клубу „Русин” зазначели пораженє од другопласованей екипи „Спартак Войпут” и релативно лєгку побиду процив остатнєпласованих рукометашох „Зомбора”.

Борели ше Русиновци процив рукометашох „Спартак Войпут”, алє чежко посцигнуц побиду процив такей убавеней и квалитетней екипи. Закончели зоз резултатом 23:16 (15:5). Нагоду за одпочивок, та и опробованє на терену шицких бавячох, „Русин” мал процив екипи „Зомбора”, дзе однєсли побиду з резултатом 15:13 (6:6).

На турниру за „Русин” бавели Накич (13), Стойков (5), Ґовля (3), Няради (3), Планчак (2), Надь Давид (2), Максимович (1), Гарди (1), Чордаш (1), Ковачевич, Бодянец и Шимек, мрежу чували Зорич и Новта, а тренерску потримовку им дали Злата Паплацко и Владимир Планчак.

Екипа „Русину” затримала пласман на штвартим месце зоз 14 бодами, после 13 одбавених змаганьох зазначели седем побиди и пейц пораженя, и позитивну ґол розлику од 19 ґоли. Трецепласована екипа „Далматинац” зоз Ридїци ма исте число бодох, алє їх ґол розлика векша за 14.

Од септембра почнє нова сезона, у Рукометним клубу задовольни зоз пласманом, а тераз ше векшина бавячох пошвеци змаганьом з першим тимом „Русину”, цо и циль же би ше формовало моцнєйшу подмладзену екипу за наиходзаци змаганя.

ПОВЯЗАНИ ТЕКСТИ