НОВИ САД – На завартей схадзки (17. и 18. децембра) представена роботна верзия новей Стратеґиї розвою системи явного информованя у Републики Сербиї.
Професийне совитованє, на котрим участвовали представителє Влади Републики Сербиї, медийох, фахових медийних здруженьох и новинарох, отворела премиєрка Ана Брнабич.
На професийним совитованю бул и директор НВУ „Руске слово” др Борис Варґа, котри од лєта участвує у консултованю коло виробку новей медийней стратеґиї, обласци медиї на язикох националних заєднїцох.
До роботней верзиї Стратеґийного документу з обласци явного информованя вошли вецей предклади котри дали представнїки меншинских медийох з Войводини.
На професийним совитованю директор НВУ „Руске слово” глєдал же би ше у новей Стратеґиї децидно наглашело же би медиї чийо снователє национални совити националних меншинох держава Сербия стаємно и тирвацо финансовала, з оглядом же така формулация нє вошла до роботней верзиї того документу.
У процесу приватизациї локалних медийох од 2014. року одлучене же би держава престала финансовац шицки медиї окрем явних медийних сервисох РТС и РТВ, „Политики” и „Новосцох”, як и медийох чийо снователє национални совити националних меншинох.
Плановане же би нова Стратеґия розвою системи явного информованя у Републики Сербиї требала буц усвоєна по конєц того року и же би шлїдуюци пейц роки була основа за реґулованє медийней сфери, а окреме почежкосцох зоз котрима ше медиї и новинаре стретаю.