НОВИ САД – У еминентней новосадскей Ґимназиї „Исидора Секулич”, у рамикох „Ярнїх Бранкових дньох”, отримана интерактивна годзина наволана „Стретнуце зоз поетом”, на котрей представени руски поета Микола Шанта.
Увод до представяня Шантовей поезиї висловел директор „Бранкового кола” Ненад Ґруїчич хтори визначел же за Шветови дзень поезиї „Бранково коло” обявело штири кнїжки поезиї, цо нє зазначенє у швеце, а автор ше ґимназиялцом представел зоз своїма писнями преложенима на сербски язик.
З тей нагоди представени и пейцме млади поетове зоз тей Ґимназиї хтори ше представели зоз по єдну свою писню, а спонтано госцуюци поет Шанта их прекоментаровал. Миколу Шанту зоз биоґрафию представел модератор тей нєзвичайней годзини Дамир Малешев, професор филозофиї, хтори през квалитетни питаня приблїжел Шантову творчосц школяром.
