НОВИ САД – У просторийох Заводу за културу войводянских Руснацох у Новим Садзе, вчера представена публикация „Етнолинґвистична виталносц руского язика у Сербиї” авторки Биляни Дражович, хтора друкована як седма по шоре кнїжка у едициї „Иновациї – Владимир Ґарянски” наменєней за обявйованє академских мастер роботох чия тематика ше одноши на историю, културу, язик и национални живот Руснацох.
У мастер роботи хтору Биляна Дражович одбранєла у септембру того року на Филолоґийним факултету Беоґрадского универзитета виглєдоване положенє руского язика по параметрох Скали виталносци язикохУнеска, на основи хторей ше описує кельо єден язик „живи” и яка му перспектива у ґлобализованим швеце, дзе вше швидши процес геґемониї вельких и вимераня малих язикох. По достатих резултатох, руски язик у Сербиї авторка оценєла зоз просекову оцену 3,88 на скали од 0 по 5, цо солидни резултат, алє дзепоєдни параметри накладаю осторжносц и вимагаю акцию.
На добре нащивеней промоциї, дзе попри фамелиї и приятельох авторки були и нашо фаховци з обласци линґвистики и филолоґиї, о роботи бешедовали мср Биляна Дражович, мр Гелена Медєши хтора роботу преложела на руски язик, и проф. др Янко Рамач, єден з єй менторох
Мастер робота Биляни Дражович за публикованє вибрана на тогорочним конкурсу Заводу за културу войводянских Руснацох хтори тота институция розписує кажди рок з цильом промововац науково-виглєдовацку роботу младих членох академскей заєднїци.
