БЕОҐРАД – Вовторок, 18. децембра, у Народней библиотеки у Беоґрадзе отримане стретнуце з назву „Дияспора и ґлобализация: руски приклад” котре реализоване у рамикох проєкту „Каламенє руского беоґрадского конара: стари и нови беоґрадски Руснаци”.
На стретнуце пришли коло трицец особи заинтересовани за Руснацох и за историйни податки з нашей прешлосци, о чим им през свойо преподаваня бешедовали проф. др Йоаким Стрибер, проф. др Янко Рамач и Михал Рамач.
Госцох у Народней библиотеки привитала панї Милена Дьордєвич, а спред Заводу за културу войводянских Руснацох, котри финансийно потримал тот проєкт, директорка Анамария Ранкович.
Др Йоаким Стрибер у своїм преподаваню наглашел важносц будованя Катедралней церкви у Руским Керестуре по приселєню до Панонскей ровнїни котра своєродни символ обставаня Руснацох у тих крайох. О тим яки важни язик, школа, алє и упартосц и моцна дзека за отриманьом котри бул моцнєйши од замервених обставинох у прешлосци бешедовал др Янко Рамач. О початкох нашей литератури, чий зачатнїк Гавриїл Костельник, нащивительох упознал Михал Рамач и, наявююци обявйованє Библиї по руски, потверздел же наш кодификовани язик и литература на тот способ положа вельки испит и приключа ше ґу народом швета котри тото богатство маю на своїх язикох.
На стретнуцу бул и предсидатель Националного совиту Руснацох Борислав Сакач, члени Желько Ковач и Олена Папуґа, котра и народна посланїца, як и други Беоґрадянє заинтересовани вецей дознац о Руснацох.
У музичней часци наступела Ана Римар Симунович зоз Нового Саду, а конферансу водзела Адрияна Надь зоз Руского Керестура, котра студира у Беоґрадзе.
Подїю орґанизовала Парохия св. Кирила и Мефтодия у Беоґрадзе зоз финансийну потримовку Заводу за културу войводянских Руснацох.
