НОВИ САД – У орґанизациї Центру за реґионализем, у Ґалериї Матици сербскей у Новим Садзе вчера, 16. октобра, отримани Округли стол з тему „Менєй числени национални меншини-заєднїци, статус и отворени питаня”, хторе облапело седем менєй числени меншини – словенску, греческу, ческу, українску, руску, єврейску и нємецку. Тематику виглєдовал тим Центру за реґионализем, а з потримовку Канцелариї за людски и меншински права и Покраїнскиого секретарияту за образованє, предписаня, управу и национални меншини-заєднїци.
Виглєдованє провадзело менєй числени меншини-заєднїци, хтори чишля до 4 500 жительох, а винїмок була руска национална меншина (з коло 14 000) и хтора, як поведзене – приклад доброго орґанизованя.
Резултати виглєдованя представели виглєдоваче на проєкту Єлена Перкович и Дарко Баштованович, а директор Центру за реґионализем Александар Попов на сходзе окреме привитал Биляну Маркович з Министерства за державну управу и локалну самоуправу, Милинку Хрчан з Покраїнского секретарияту за образованє, управу, предписаня и национални меншини-заєднїци, Владимира Радуловича з Канцелариї за людски и меншински права, представительку Мисиї ОЕБС-у у Сербиї Зузану Павликову, представительох Амбасади Ческей Републики и представительох Националних совитох.
Як поведзене на сходзе, проблеми з хторима ше стретаю менєй числени национални меншини-заєднїци нє вше видлїви и прето їх припаднїки нє вше конзумую свойо заґарантовани права у штирох обласцох – образованю, култури, информованю и службеним хаснованю язика и писма.
Тиж визначене же таки виглєдованя барз ридки, та тот проєкт бул пионирска робота у тей обласци.
