ВЕРБАС/КУЛА – Внєдзелю, 19. марца, кандидат за предсидатела Сербиї спред Ґрупи гражданох „За Сербию без страху” Саша Янкович, котрого потримує и Демократска странка, нащивел Кулу и Вербас, дзе представел свою програму.
У Кули Саша Янкович мал нєформалне стретнуце зоз своїма симпатизерами у кафичу „Спорт старс“, дзе бешедовал з гражданами, а у Вербаше ше прешпацирал по главней улїци и строгим центре городу и так бешедовал з людзми на улїци.
Окремну промоцию своїх закладаньох як предсидателя Сербиї Янкович у Вербаше отримал у сали Готелу „Бачка“, дзе гварел же би людзе нє требали меняц себе и свою свидомосц, алє же би держава мала буц законодавна и праведна.
– Предсидатель муши буц вяза медзи людми и власцу, муши слухац и почитовац гражданох. Принцип подзелєня власци поставени прето же би ше нє дошлєбодзело дакому превежнуц шицку власц. Александер Вучич дума же вон держава, и ми мушиме виратовац державу, бо нам є однята. Власц то одвичательносц, а нє моц – гварел Янкович.
На трибини присутних привитала и Ясмина Долапчев, треца на лїстини коалициї „Ошлєбодзме Вербас” на локланих виберанкох у Вербаше.