НОВИ САД – Национална служба за обезпечованє роботи (НСЗ), Филияла у Новим Садзе, поволала роботодавательох и нєзаняти особи на 25. Саям за обезпечованє роботи котри орґанизує Город Нови Сад и Филияла НСЗ Нови Сад.
Саям будзе отримани у рамикох Сайма образованя „Драгокази” 9. марца од 10 до 16 годзин, у голу Мастер центра Новосадского сайма, улїца Гайдук Велькова 11.
Нєзаняти особи котри заинтересовани за тот Саям треба же би ше приявели свойому совитнїкови и так достали шицки потребни информациї. НСЗ тиж посовитовала нєзаняти особи же би пред приходом на Саям закончели Обуку за активне глєданє роботи у орґанизациї Филияли (писанє роботней биоґрафиї, пририхтованє за интервю и други совити), же би ше на найлєпши способ представели роботодавательови.
Роботодавателє свойо участвованє на Сайму можу приявиц по 2. марец у просторийох Филияли Нови Сад, улїца Алберта Томе 2, лєбо на имейл: dragana.jaksic@nsz.gov.rs.