КУЛА – У Културним центре Кула пияток, 9. марца, отримана 50. Општинска смотра рецитаторох „Максим Єкнич”, хторей домашнї були КУД „Крущич” з Крущичу, Културни центер Кула и Културно-просвитна заєднїца Општини Кула.
Змагали ше 32-ойо рецитаторе у трох возростох – дзевецеро у младшим (школяре нїзших класох ОШ), петнацецеро у штреднїм (школяре висших класох ОШ) и осмеро у старшим возросту (штредньошколци, студенти и други), а медзи нїма и осмеро рецитаторе з Руского Керестура. На Зонску смотру пласовали ше дзеветнацецеро рецитаторе.
У младшим возросту перше место освоєла Лара Сопка з Кули, друге Ема Живкович з Керестура, а треце место завжал Давид Нинков з Кули. Попри нїх, на Зонску смотру ше пласовали и Яна Варґа и Иван Планчак, обидвойо з Керестура, як и Наталия Дюричич з Липару.
У штреднїм возросту перше место освоєла Лїляна Кнежевич з Кули, друге Сташа Зорич з Червинки, а треце место Петронела Феньвеши з Кули. На Зонску смотру ше пласовали и Ребека Семан и Валентина Новта з Керестура, як и Лука Ноґавица, Йована Щепанович и Исидора Нинков, шицки тройо з Кули.
У старшим возросту перше место освоєла Владица Кляїч з Кули, друге Мирослав Малацко, а треце Павлина Шепински, обидвойо з Керестура. Попри нїх, на Зонску смотру ше пласовали и Катарина Перович и Стефан Ковиянич, обидвойо з Кули.
Попри спомнутих, з Руского Керестура на Општинскей смотри участвовала и Минеа Югас у штреднїм возросту, док Тимеа Будински зоз старшого возросту нє могла присц пре приватни причини.
Рецитаторох на Општинскей смотри оценьовал селектор Миодраґ Петрович, ґлумец Сербского народного театру з Нового Саду, док консултант за руски язик бул Александер Мудри, а за мадярски Юлия Киш-Дороґхази.
Госци на смотри були школяре Школи за основне музичне образованє у Кули, як и рецитаторка Сара Чапко зоз Предшколскей установи „Бамби” Кула.
Рецитаторох з Керестура порихтали Оленка Живкович, Наталия Зазуляк, Ивана Дудаш и Мая Зазуляк Гарди.
Зонска смотра за рецитаторох зоз Заходнобачкого и Южнобачкого округу будзе 17. и 18. марца у Бачу.