КОЦУР – У лєтнєй учальнї ОШ „Братство єдинство“ у Коцуре всоботу, 10. юния отримани семинар за наших просвитних роботнїкох на хторим, попри домашнїх, присуствовали учителє и наставнїки з Руского Керестура и Вербасу, а преподавали мр Ксения Сеґеди и др Яков Кишюгас.
У першей часци семинару мр Ксения Сеґеди бешедовала о уплїву сербского язика на руски, о прекладательстве як дїялносци, а отримана и роботна часц у хторей присутни прекладали тексти.
У другей часци семинару др Яков Кишюгас бешедовал о образовних стандардох у настави руского язика, як и о тим цо би школяр мушел знац кед закончи шесту и седму класу.
Гоч семинар нєакредитовани и за ньго ше нє достава боди, бул хасновити, а орґанизовало го Оддзелєнє за русинистику Филозофского факултету у Новим Садзе, у сотруднїцтве з Национални совитом Руснацох.
