БЕОҐРАД – Министер польопривреди Бранислав Недимович гварел же помедзи 8. и 12. авґустом почню роботи на штирох будовательних системох за наводньованє на териториї Войводини, а по конєц авґуста буду отворени ище седем таки будовалїща на подручю Сербиї.
Недимович, госцуюци на телевизиї Пинк, гварел же на подручю Войводини три проєкти на простору штреднього Банату, а єден на простору општини Вербас – у Бачки. „Пририхтую ше ище три проєкти на простору централней Сербиї. Идея же бизме на тот способ 30 000 хектари жеми положели под системи за наводньованє” – наведол Недимович.
Контракти, по його словох, буду заключени у другей половки авґуста, а початком септембра почнє реализация, док роботи на системи медзи Саву и Дрину почню концом рока. У 2018. року почнє друга фаза проєкту котра облапи простор коло Чачку, док треца система будзе коло Смедерева и Алексинцу. Як пояшнєл, роби ше о беґельох котри скорей хасновани лєм за наводньованє, а тераз ше кладу вельки пумпи котри буду препумповац воду або зоз каналу Дунай-Тиса-Дунай, або зоз рикох кед суша и нєт води.
Недимович наявел же на єшень Министерство будзе мац и окремни сектор котри ше будзе занїмац зоз климатскима пременками у польопривреди.