КОПАОНИК – Гоч Сербия барз напредовала у реформох, обласц у хторей треба вецей робиц то образованє и укладанє до дзецох, гварел директор УНИЦЕФ-у у Сербиї Мишел Сен-Ло на Копаоник-бизнис форуму и визначел податок же влонї у Сербиї було аж 32 000 дзеци менєй.
– Нєобходне укладац до каждого дзецка, же би витворело свой потенциял. У Сербиї маме зменшованє числа жительох, а на кажде дзецко треба патриц як на златнїк до хторого треба укладац же би розвило свойо потенцияли и познєйше доприношело дружтву – гварел Сен-Ло.
Розвой каждей жеми порушує укладанє до дзецох и роботней моци, та барз значне запровадзиц програми вчасного ученя за дзеци предшколского возросту. Як гварел Сен-Ло, у Сербиї лєм коло 50 одсто дзецох участвує у програмох предшколского возросту, а тот процент ище менши у руралних штредкох.
– Дзеци котри провадзели програми вчасного ученя указую лєпши резултати у дальшим школованю. Сербия муши вецей укладац до образованя – гварел Сен-Ло.