БЕОҐРАД – Предсидатель Союзу самостойних синдикатох Сербиї (СССС) Любисав Орбович предсидательки Влади Сербиї Ани Брнабич вчера послал допис у хторим вимага же би ше „претаргло каранє гражданох котри одходза до скорейчасовей старосней пензиї”, преноши Танюґ.
Орбович у писму наведол же СССС Социялно-економскому совиту Сербиї упутел инициятиву за вименку и дополнєнє Закона о пензийним и инвалидским осиґураню з 2014. року за тирваце утаргованє каребних поенох кед пензионере пойду до скорейчасовей пензиї, односно же би з наполньованьом 65 рокох старосци доставали полну заробену пензию.
Отже, у члену 70а спомнутого закона, дефиноване же ше „висина скорейчасовей старосней пензиї одредзує на исти способ як и висина старосней пензиї, з тим же ше винос так одредзеней пензиї тирвацо зменшує за 0,34 одсто за кажди мешац скорей наполньованя 65 рокох живота”.