НОВИ САД – У Скупштини Войводини стреду, 21. юния, Покраїнски секретарият за културу, явне информованє и одношеня з вирскима заєднїцами орґанизовал совитованє з назву „Можлївосци финансованя проєктох у обласци култури з ЕУ фондох”, насампредз за ношительох функцийох у локалних самоуправох, алє и за занятих у покраїнских институцийох котри пририхтую проєкти.
Заменїк покраїнского секретара у спомнутим секретарияту др Небойша Кузманович наглашел же скоро кажда локална самоуправа у Войводини ма даєдну локацию, артефакт, културне нашлїдство з чим би могла апликовац на актуални конкурси ЕУ, та прето важне дознац о прикладох успишно реализованих проєктох. То источашнє и нове виволанє за шицких котри жадаю научиц цо то програми „Креативней Европи”, културней индустриї и о других змистох.
О програмох прейґгранїчного сотруднїцтва прейґ IPA INTEREG и других иножемних фондох за проєкти з обласци култури бешедовала Мина Радмилович Певац з Фонду „Европски роботи”, док о програми „Креативна Европа” и єй одреднїцох бешедовал руководитель Деску креативна Европа Сербиї Димитриє Тадич.
Приклади добрей пракси у тей обласци представели Лука Кулич з Музею сучасней уметносци Войводини и др Славица Вуйович з Покраїнского заводу за защиту памятнїкох култури.
О улоги Покраїнского секретарияту за културу, явне информованє и одношеня з вирскима заєднїцами у потримовки при конкурованю за средства з европских фондох бешедовали сотруднїци у Секретарияту Бояна Беґович и Лїляна Чумура.