ДЮРДЬОВ – Тогорочни 15. Фестивал жридлового шпиваня „Най ше нє забудзе” отримани вчера, 20. авґуста, у Дюрдьове, уж по традициї трецого тижня у авґусту. У програми наступели петнац шпивацки ґрупи – у змагательней конкуренциї тринац ґрупи з дзешец наших местох зоз Сербиї и Горватскей и два у ревиялней часци.
Побиднїк тогорочного фестивалу Дзивоцка шпивацка КУД „Тарас Шевченко”, а Специялну награду достала Дзивоцка шпивацка ґрупа Руского културного центру з Нового Саду.
Фестивал отворел подпредсидатель Националного совиту (НС) Руснацох Микола Шанта, а шицких присутних привитал и предсидатель Совиту Месней заєднїци Душко Михелц. Медзи визначнима госцами на Фестивалє привитани и конзул Амбасади України Олександер Порезников, директорка НВУ „Руске слово” Мартица Тамаш, о. д. директорки Заводу за културу войводянских Руснацох Анамария Ранкович, директорка ОШ „Йован Йованович Змай” у Дюрдьове Вукица Петрович, членїца Општинскей ради Општини Жабель задлужена за културу Нерима Шовлянски, як и госци зоз Републики Словацкей.
Фестивал по традициї отворел прешлорочни побиднїк – Дзивоцка шпивацка ґрупа Дома култури з Руского Керестура, потим шпивала їх Хлопска шпивацка ґрупа, Дзивоцка и Хлопска шпивацка Руского културного центру з Нового Саду, Женска ґрупа КУД „Иван Котляревски” з Бикичу, Хлопска ґрупа КУД „Яким Гарди” з Петровцох з Горватскей, Мишана ґрупа КПД „Карпати” з Вербасу, Младша мишана ґрупа КПД „Дюра Киш” зоз Шиду, Женска ґрупа КУД „Жатва” з Коцура, вєдно Женска и Мишана ґрупа Руского КУД „Др Гавриїл Костельник” з Кули, Хлопска домашнього КУД „Тарас Шевченко” и Женска ґрупа КУД „Яким Ґовля” з Миклошевцох.
У ревиялней часци участвовали Шпивацка ґрупа „Дюрдєвак” з Дюрдьова и Шпивацка ґрупа „Лаборски бетяре” з Медзилаборцох з Републики Словацкей. Шицки учашнїки на тогорочним Фестивалу достали на дарунок гоклу.
Учашнїкох оценьовал жири у хторим були Татяна Колєсар Ґвоїч, Мария Тот, Юлиє Еделински и Агнета Тимко Мудри котра, як предсидателька жирия, преглашела наградзени ґрупи и уручела им награди. Конферансу, котру написал Яким Чапко, водзели Кристина Горняк и Тарас Чапко.
Фестивал жридлового шпиваня „Най ше нє забудзе” находзи ше у Календаре репрезентативних манифестацийох НС Руснацох, а снователь и главни орґанизатор Фестивалу КУД „Тарас Шевченко” з Дюрдьова. Фестивал финансийно потримали Покраїнски секретарият за кулуру, явне информованє и одношеня зоз вирскима заєднїцами, Покраїнски секретарият за образованє, предписаня, управу и национални меншини-национални заєднїци, НС Руснацох, Завод за културу войводянских Руснацох, Општина Жабель и Основна школа „Йован Йованович Змай” зоз Дюрдьова, а медийно потримали шицки явни медиї на руским язику.
(Вецей фотоґрафиї буду поставени у нашей фотоґалериї)
