Стретнуце руских основних и штреднїх школох

автор влдї
1k Опатрене

БИКИЧ/ШИД – Всоботу, 3. юния, у Бикичу и Шидзе отримане 23. Стретнуце руских основних и штреднїх школох, а почало з приходом школярох, наставнїкох и госцох до Подручней школи ОШ „Сримски фронт“ у Бикичу.

Стретнуце отворене у Доме култури з интерпретованьом стихох „Руским дзецом“ Гавриїла Надя, а учашнїкох привитали Ирина Папуґа спред Дружтва за руски язик, литературу и културу, предсидатель Совиту Месней заєднїци Бикич Деян Бобаль, дакедишнї директор ОШ „Сримски фронт“ Никола Кнежевич, професор руского язика Зденко Лазор и учитель з Руского Керестура Славко Надь, котри у шидскей општини дакеди викладал руски язик з елементами националней култури.

У Бикичу учашнїки Стретнуца нащивели грекокатолїцку церкву, школу, у хторей перши учитель бул Михайло Ковач и Етно-хижу, у Шидзе Народну библиотеку „Симеон Пищевич“, Ґимназию „Сава Шуманович“, як и Спомин-памятнїк „Сримски фронт“ при Адашевцох.

У матичней ОШ „Сримски фронт“ у Шидзе отримана пригодна програма школярох и додзелєни припознаня школяром, просвитним роботнїком и институцийом котри помогли у отримованю Стретнуца.

На Стретнуцу участвовали школяре и просвитни роботнїки з Руского Керестура, Нового Саду, Дюрдьова, Ґосподїнцох, Шиду, Бачинцох, Бикичу и Беракасова, як и з Петровцох, Миклошевцох и Вуковару з Републики Горватскей.

ПОВЯЗАНИ ТЕКСТИ