НОВИ САД – Всоботу, 26. мая, на Филозофским факултету, у семинарскей библиотеки Оддзелєня за славистику, у орґанизациї Виглєдовацкого кругу, отримана Штварта наукова конференция за студентох, младих науковцох и фаховцох.
Спред Виглєдовацкого кругу учашнїкох привитал Сашо Сабадош, а привитни слова упутела и Анамария Ранкович, директорка Заводу за културу войводянских Руснацох. О Зборнїку роботох зоз Трецей науковей конференциї бешедовал рецензент др Янко Рамач, хтори и отворел Штварту наукову конференцию зоз словами потримовки. Вон наглашел же и того року на конференциї участвує исте число учашнїкох, цо гутори же єст и добри идеї, алє и моци реализовац их.
У першей сесиї Дюрдїца Ґордич презентовала роботу „Миґрациї у двацетим вику у литературним контексту на прикладох Жироша и Црнянского”, Саша Сабадош мал тему „Югославянство у новинох Заря/Руска заря (1934-1940)” и Андрей Орос бешедовал о „Улоги Руских новинох у националним препородзе Руснацох”.
Другу сесию розпочала Марина Шлемендер зоз роботу „Еквиваленти анґлийским префиксом у Алиса у жеми чудох Луиса Керола на руским язику”, а Тамара Салаґ и Лидия Костелник презентовали роботу „Службове хаснованє руского язика и писма у Войводини”, хтору и пририхтали, а у виглєдованю з нїма ище участвовали и Дарко Заґорац, Андрей Орос и Александер Мудри. Роботу на тему „Препознаванє поетики Михайла Ковача у додатку Вибрани писнї у Руским слове 1984. року” презентовала Ана Римар Симунович. А интересантну полемику виволала робота „Самоесенциялизация рускей култури як механїзем дружтвено-политичного леґитимитету” хтору презентовала Марина Сакач.
По законченю Конференциї друженє полемики и бешеда о роботох ше предлужели на Оддзелєню за русинистику.
