Судзенє

автор Кристиян Сопка
1.2k Опатрене

– Виновати є! – кричал судия.

– Виновати є! – кричали поротнїки.

– Нє виновати сом! – пробовал их надкричац тот цо на ньго указую зоз пальцом.

– Виновати є! – кричали патраче.

– А, за цо ши нє виновати, панє?! – питал ше судия, червени у твари, алє без стварного жаданя за одвитом.

– Я нїч нє звинєл. Я нє виновати нїзач – гварел, нєбизовно обвинєни. После його словох настал вельки шмих у сали.

„Дня, 09.04. приведзени Рихри Т., реґистерске число: 004022498, до суду општини Е. пре тайни поступок, заведзени як: ТП401-Д6, хтори ше водзи процив нього. Судзенє ше отримало истого дня у просторийох спомнутого суда. Судзенє водзел препочитовани судия А. Рипросов. Поротнїки були чесни, визначни и обєктивни людзе зоз народу. Назберало ше вельо патрачох хтори нєсцерпезлїво од рана чекали видзиц як правдиви судия…” – писало на єдним документу у архиви суда, вельо роки после. Було видно же документ нєдокончени, нєподписани и нє ма вдерени печац. На рамиких були слова, „СТРОГА ТАЙНА”, виписани зоз червенима буквами.

– Цошка ши лєм мушел зробиц кед ше водзи поступок процив тебе на суду. Нашо служби одвичательно робя свою роботу – предлужел судия – Бешедовал ши дацо цо ше нє шме?

– Нє знам – поганьбено гварел Рихри.

– Цо же знаш?! – нагнївано скричал судия.

– Нє знам цо ше нє шме повесц, алє то нїхто нє зна. То тайна. Я лєм гварел тото цо думам.

– Еее, ту зме тераз. Ти ше усудзуєш думац?! – знова скричал судия и почал ше гласно шмеяц, за нїм и шицки у сали.

– Я мам свойо думанє! – кричал нєщешлїви чловек.

– СВОЙО ДУМАНЄ! – злярмал судия ставаюци.

Так нагло станул же карсцель, на хторим шедзел, спаднул назадок. Теди ше вельки брух шивого чловека зявел у цесней кошулї. Як ше нагинал напредок, так його садло вше баржей лєжало на столє. Випатрало же ше нагина пре чежину бруха. Сцел ше нагнуц ґу тому цо го так увредзел, медзитим, нє могол. Барз прицискал брух, та ше на концу оддумал од такей роботи.

У тей хвильки постало Рихрийови ясне прецо є ту. Роками нє розумел прецо шицки людзе гуторя исте, зоз истима словами, и на исти способ.

– Пан судия, чи гуториц свойо думанє у зраженю зоз тайнима законами по хторих ше мнє судзи? – питал ше шмело, Рихри.

– Як же я то знам?! Га, панє?! – причекал судия даскельо секунди, и шеднул назад на карсцель, зоз помоцу єдного службенїка. –То тайни закони. Волаю ше тайни прето же их нїхто нє шме знац – поцешени судия, заштудирано гварел.

Рихри видзел же битка страцена и же будзе осудзени. „Нєт кадзи” – думал у себе.

– Добре, пан судия.

На тоти слова ше судия барз нєсподзивал. У його кариєри ище нїхто нє гварел же є виновати на тайним поступку, а шицки були осудзени.

– Я зробел тото – предлужел Рихри.

– Цо? – нєприємно ше питал судия, хтори нє знал цо робиц у таким розвиваню подїйох.

– Виновати сом за шицко за цо ми ше судзи – жубротанє у сали постава вше векше.

– Цо ши зробел? Поведз нам же бизме закончели уж раз зоз тим.

– Нє.

– Нє? – зачудовано ше питал судия, баржей за себе.

– Кед ви мнє нє мушице повесц прецо ми судзице, я вам нє мушим повесц за цо сом виновати.

„Тото постава озбильне. Цо тераз робиц?” – роздумовал судия.

– Гварел ши свойо панє. Виновати ши – судия пробовал закончиц швидко, понеже видзел же публики нє по дзеки – нє можем я цали дзень ту шедзиц зоз тобу. Готове. Водзце го вонка.

– А, поротнїки? Цо вони гваря? – пробовал дойсц до слова осудзени.

– Гварице же є виновати, чи нє?! – строго ше питал судия.

– Виновати є – мушели потвердзиц поротнїки, по службеней длужносци. Нє зоз дзеку вигварели тоти слова.

– Ево ци! – видрижнююцо виповед судия кед ставал. – Осудзени ши на строги гарешт як и шицки.

– Алє я виноватши як вони – зоз ошмихом гварел, як кед би ше цешел зоз собу.

– Нє можеш ти знац же ши виноватши – пробовал ше вицагнуц судия.

– Я знам за цо сом виновати. Я єдини ту знам як сом робел процив тайного закону. Я знам кельо сом виновати – побиднїцки заключел Рихри.

Судия ше почал оглядац коло себе. Патраче лярмали и шмеяли ше. Поротнїки медзи собу шептали. Официре и службенїки скривали ошмих. Знал же ше з нього шмею.

– До дябла зоз тобу! – гуторел осудзеному. – До сто дяблох зоз шицкима!  – прежубротал себе до бради.

– Роздумуєм зоз своїм розумом, на то ми Бог дал шлєбодну дзеку. Ви мнє ту приведли лєм же бисце ме осудзели. Судзице людзом прето же гваря же су гладни, кед су гладни; прето же крича „нєправда” кед дахто спреведа; прето же гуторя нєприємну правду. Нє маце шмелосци так повесц, та сце здумали Тайни Закон – були то закончуюци слова того судзеня.

Судия вишол на мали дзвери, зоз боку. То баржей здабало на сцеканє, бешедовали людзе у карчми того вечара. Патраче нє скривали одушевиє. Службенїки нє знали цо робиц зоз Рихрийом. Кед ше нєшор дакус змирел, патраче почали виходзиц. У сали остали двоме официре, двоме службенїки и Рихри. Єден службенїк и єден официр го сцели загарештовац, а други двоме го сцели пущиц.

ПОВЯЗАНИ ТЕКСТИ