ШИД – Вчера, 13. децембра, отримана закончуюца схадзка явней дебати о предлогу општинского буджету за 2109. рок хтора тирвала од 23. новембра по 12. децембер, цо була и законска обовязка.
Ядранка Недич, руководителька Оддзелєня за буджет и финансиї Општинскей управи, гварела же до огляду вжати предлоги хтори винєшени под час тирваня явней розправи.
Месна заєднїца Сот вимагала з новим буджетом средства за вибудов каплїци, МЗ Ґибарец средства за ришованє проблема зогриваня сали Дома култури, а предложени и додатни средства за вибудов паркинґу коло нового будинка за вибеженцох у населєню „Восток”.
Тиж предложене и же би ше обезпечело средства за польочуварску службу, пирсканє суньоґох, меранє уровня заґадзеносци воздуху и подобне.
Недичова наглашела же було достаточно часу за подношенє предлогох и же то зробели оддзелєня општинскей управи и месни заєднїци, а їх предлоги послати Опшинскей ради на одлучованє и утвердзованє Предлогу одлуки о буджету за 2019. рок о хторим ше вияшнї Скупштина општини.