КОЦУР – Стреду, 1. новембра, у Велькей сали Месней заєднїци, коцурске Здруженє „Бачки малинаре“ и члени задруґи „Наша задруґа”, отримали схадзку на котрей окрем членох здруженя и задруґи були и представителє Министерства польоприверди, лєсарства и водопривреди, Покраїнского секретарияту за польопривреду, локалней самоуправи и предсидателє здруженя малинарох зоз Оджаку, Кули и Параґох.
На схадзки зоз коцурскима малинарами були державни секретар у Министерству польопривреди Боґдан Иґич, директор Управи за аґрарни плацаня Жарко Радат, совитнїк министра за польопрвреду Предраґ Лучич и помоцнїк покраїнского секретара за польопривреду, лєсарство и водопривреду Младен Петкович.
Предсидателє малинарох зоз околних местох присутних упознали же яка була сезона малинох у їх здруженьох и на котри способ ше пририхтую за шлїдуюцу сезону.
Малинарох найвецей интересовало на котри способ Министерство польопривреди може помогнуц же би ше у Коцуре направело хладзальню, яки условия за субвенциї за купованє оберача малинох и прецо ше войводянских малинарох нє вола на схадзки котри ше орґанизує зоз малинарами зоз заходней Сербиї.
Зоз Министерства за польопривреду поручели же будучносц у цо векшим здружованю, нє лєм до задруґох, алє треба здружовац и сами задруґи, и же помогню у писаню елаборату котри нєобходни же би ше достало жем на котрей ше будзе правиц хладзальню, бо им циль же би кажди валал у котрим ше людзе навелько занїмаю зоз овоцарством и продукцию желєняви достал свою хладзальню.
