НОВИ САД – На сходзе о дїловним окруженю и инвестицийней клими у Войводини, хтори у Новим Садзе отримани 8. юния, предсидатель Покраїнскей влади Иґор Мирович виявел же Войводина добре место за укладанє. Як гварел, укладачох з иножемства можу прицагнуц обща политична и економска стабилносц, добра политика националней влади, стабилни явни финансиї, як и обезпечованє вигодней инвестицийней клими и вибудов инфраструктури за иножемних укладачох на покраїнским и локалним уровню.
Сход о дїловним окруженю и инвестицийней клими у АП Войводини орґанизовал Словенски дїловни клуб, хтори децинию и пол потримує привредне сотруднїцтво и повязованє словенских и сербских компанийох.
Мирович виявел же на схадзки двох владох, як приоритетни обласци сотруднїцтва медзи Сербию и Словению, видвоєни информацийни технолоґиї, защита животного штредку, польопривреда и туризем.
О тим же Войводина вигодне место за укладанє гуторя и податки о привредних рушаньох у нашей Покраїни за перши тогорочни штири мешаци, бо у першим кварталу зазначени рост индустрийней продукциї за 5,2 одсто, у одношеню на исти период прешлого року.
Мирович додал же у истим периодзе зазначени и рост звонкатарґовинского обтоку за 19,5 одсто, односно у вредносци 3,2 милиярди динари. Интензивнєйши и вивоз за 21,5 одсто, вредносци 1,56 милиярди еври, док дефицит тарґовинскей черанки зменшани за 24,3 одсто.