ҐОСПОДЇНЦИ – У Основней школи „Жарко Зренянин” у Ґосподїнцох всоботу, 19. мая, бувши школяре преславели пейдзешатрочнїцу малей матури. Орґанизаторе стретнуца були Влайко Теґелия и Владимир Салонски, а на друженє пришли 25 особи. У ґенерациї народзеней 1960/61. року було 40 школярох котри у єдним оддзелєню закончели осму класу.
У тей ґенерациї були седмеро Руснацох котри руски язик учели при панїматки Ани Горняк Кухар. Були то – Мария Папуґа, Леона Кухар (тераз Ґоворчин), Михал Лазор, Владимир Лазор, Стефан Дудаш, Димитриє Лазор и Владимир Салонски. Поряднє, од першей по осму класу, учели и грекокатолїцку виру при тедишньому парохови о. Юлиянови Горнякови Кухарови.
После друженя у школи бувши школяре нащивели виставу у просторийох Месней заєднїци Ґосподїнци, а потим друженє предлужели у ресторану. Того дня, дзекуюци орґанизатором, на памятку достали маґнет з амблемом школи и роком кеди ю закончели.