НОВИ САД – У рамикох манифестациї Днї України, на сцени „Йован Дьордєвич” у Сербским народним театре у Новим Садзе вчера, 21. мая, отримана програма з назву „Танєчни вернисаж”, хтору отворел и госцох привитал амбасадор України у Сербиї Олександер Александрович.
У богатей програми шестого дня спомнутей манифестациї аж 16 танци виведли танєчни ансамбли КУД „Иван Сенюк” з Кули, Дому Култури Руски Керестур, ДНУК „Коломейка” зоз Сримскей Митровици, почесни госц на концерту бул школяр М. Костюкова, котри одтанцовал „Класични українски гопак”, потим АКУДУНС „Соня Маринкович” з Нового Саду, КУД „Тарас Шевченко” з Дюрдьова и КУД „Жатва” з Коцура.
Нєшка, 22. мая, у рамикох Дньох України, тиж у Сербским народним театре, на 19 г. будзе Концерт музичней и хорскей уметносци наволани „Україна привита госцох”, на хторим участвую и Мишани Хор Дому култури и Катедралней церкви св.о. Миколая з Руского Керестура, Хор „Гармония” з Нового Саду, Хор КПД „Карпати” з Вербасу, Хор „Пасторала” зоз Жаблю, шпиваче УКЦ „Кобзар” з Нового Саду, КУД „Иван Сенюк” з Кули и ДНУК „Коломейка” зоз Сримскей Митровици.
Почесни госци на Музичним концерту буду музичаре и шпиваче Львовскей филгармониї, а як и на вчерайши, и на нєшкайши концерт уход шлєбодни.