Театер по кажду цену зачувац

автор опс
659 Опатрене

НОВИ САД – У Заводзе за културу войводянских Руснацох вчера, 20. децембра, представена Моноґрафия „50 роки Драмского мемориялу Петра Ризнича Дядї”, у присустве автора Дюри Латяка и почитовательох нашей театралней дїялносци. У видаваню Моноґрафиї участвовал Дом култури Руски Керестур, Завод за културу войводянских Руснацох и НВУ „Руске слово”. 

Присутних привитала директорка Заводу Анамария Ранкович и подзековала шицким цо участвовали на збераню обсяжного материялу за тоту пуликацию.

О кнїжки бешедовали директор Дома култури Йоаким Рац, главни и одвичательни редактор новинох „Руске слово” и рецензент Иван Сабадош, як и сам автор Дюра Латяк. О важним сотруднїцтве тих трох установох на видаваню тей Моноґрафиї бешедовал директор НВУ „Руске слово” др Борис Варґа.

О тим кельо Руснацом важна тота Моноґрафия указує єй наслов – „50. роки Драмского мемориялу Петра Ризнича Дядї” на котрим виведзени вецей як 500 драми, як и числени дзецински представи. Драмска дїялносц барз важна, насампредз пре пестованє язика и язичней култури, а тота уметносц облапя и шицки други уметносци, од литератури, ґлуми, танцованя, шпиваня по подобову уметносц. Прето потребне по кажду цену зачувац театралну уметносц при Руснацох.

– Театрална дїялносц, кед ше ю нє призначи, як кед би єй анї нє було. У тим контексту и тота кнїжка ма вельку вредносц за наш театрални живот за хтори ше наздаваме же ше и надалєй отрима и попри шицких почежкосцох – наглашел Латяк.

До дискусиї о актуелним стану и будучносци нашого театру ше уключели и присутни на промоциї.

Моноґрафия будзе подзелєна театралним дїячом и нашим културно-уметнїцким дружтвом и институцийом, а достали ю и шицки присутни на промоциї.

ПОВЯЗАНИ ТЕКСТИ