РУСКИ КЕРЕСТУР – Представителє рускокерестурских паприґарох и занятих у „АБЦ ФУД” котрим фабрика длужна пенєж по актуалним Планє реорґанизациї, вчера 18. мая, дали вияви за Телевизию Б92, за емисую „Добра жем” („Добра земља”) о предложеним новим Планє реорґанизациї „АБЦ ФУД”, по хторим би им длуство мало буц зменшане за ище 60 одсто.
Новинаре Б92 бешедовали з предсидательку Здруженя паприґарох Душицу Орос, котра винєсла проблем паприґарох зоз старим, нєвиплаценим длуством, а у мено роботнїкох и малих акционерох Владимир Винаї, котри бешедовал и о терашнїм нєпорядним виплацованю плацох.
Предсидатель Совиту Месней заєднїци Руски Керестур Владимир Олеяр на тим знїманю за ТВ гварел же тоти проблему у Хладзалнї настали по єй приватизованю, наглашуюци же Месна заєднїца може лєм потримац паприґарох и роботнїкох у їх намаганьох.
Як поведзене Рутенпресу, знїмок з Керестура на ТВ Б92 у спомнутей емисиї будзе емитовани на нєдзелю, 28. мая, на 8 годзин.