ШИД – На подручу шидскей општини тирва технїчни препатрунок комбайнох за терашню косидби ярцу и будуцу жатву жита, а комисию, хтору меновал предсидатель Општини Предраґ Вукович, творя дипл. инж. защити на роботи Драґан Стоядинович як предсидатель и члени инж. процивогньовей защити Маринко Маринкович и инж. польопривредней механїзациї Небойша Суботич.
Комисия з роботу почала 19. юния, а нєшка будзе препатрац комбайни у Ямени, Моровичу и Шидзе, на ютре у Вишнїчеве, Батровцох и Адашевцох, а на пондзелок комбайни хтори евентуално нє препатрени у порядним розпорядку.
По словох Драґана Стоядиновича, обчекує ше же буду препатрени медзи 160 и 170 комбайни на подручу цалей општини, а цена препатрунку 1 500 динари. Препатрунок звонка плану кошта 2 000 динари.
Нєурядово, косидба ярцу на 140 гектарох при концу, а урожай 4,5 до 5 тони по гектаре.
До конца мешаца вироятно почнє и жатва жита, хторе у шидскей општини пошате на 4 615 гектарох.