НОВИ САД – У рамикох септемберского уписного термину, на Универзитету у Новим Садзе приємни испити почали вчера, а тирваю и нєшка. У другим уписним кругу за упис ше приявели 603 будуци студенти, котри конкурую за 624 шлєбодни места на буджету и 2 077 самифинансуюци места.
Спрам спознаньох Рутенпресу, на Оддзелєнє за русинистику Филозофского факултету у першим уписним кругу нє уписани анї єден студент, док у тим септемберским приявени єден.
На дзепоєдних факултетох прелиминарни лїстини буду обявени такой, а конєчни лїстини факултети почню обявйовац од нєшка. Упис нових студентох почнє идуцого тижня.
И у тим уписним термину найвецей заинтересованих було за место на Медицинским факултету, дзе тераз остали лєм два шлєбодни места, и то самофинансуюци, з наставу на анґлийским язику.
На Факултету Технїчних наукох за 71 место на буджету и 332 самофинансуюци места конкуровали 74-еро кандидати, на Филозофским за 11 места на буджету и 187 самофинансуюци ше приявели 50-еро, а исте число ше штредньошколцох приявело и у Зренянину на Технїчни факултет „Михайло Пупин” – за 45 места на буджету и 119 самофинансуюци.
За 53 места на буджету и 119 самофинасуюци на Польопривредним факултету конкуровали 48-еро, док на Природно-математичним факултету прията лєм єдна приява менєй, а шлєбодни 161 место на буджету и 354 самофинансуюци.
На Правним факултету за штири буджетни и 375 самофинансуюци места конкуровали 41, на Економским факултету за 61 буджетне и 353 самофинансуюце место ше приявели 29-еро, а на Факултету за спорт и физичне воспитанє, на хторим шицки места на буджету пополнєти, за 133 самофинансуюци места ше приявели 25-еро.
На Технолоґийним факултету за 42 буджетни и 24 самофинасуюци места конкуровали 18-еро, а єдна особа менєй ше приявела на Педаґоґийни факултет у Зомборе, за 32 буджетни и 117 самофинасуюци места.
Осмеро будуци студенти ше приявели за 81 буджетне и 23 самофинансуюци места на Будовательни факултет у Зренянину, а на Учительски факултет з наставним мадярским язиком у Суботици приявенли шесцеро, за шлєбодни 16 места на буджету и 20 самофинансуюци.