Тирва Русински фестивал, на соботу и вибор найкрасшей Русинки

автор зам
1.2k Опатрене

СВИДНЇК (СЛОВАЦКА) – У Свиднїку, у Словацкей, пондзелок, 22. мая почал Фестивал култури Русинох Словацкей, популарно волани Русински фестивал, пияти по шоре, и тирва по нєдзелю, 28. май. Фестивал, як цалотижньове подняце, презентує културу Русинох у Словацкей и поза єй гранїци у рижних обласцох, а як учашнїки и як госци, на Фестивалє участвую и Руснаци зоз Сербиї.

На Фестивал до Свиднїку нєшка одходзи Жридлова мишана шпивацка ґрупа КПД „Карпати” з Вербасу и представителє Дружтва, як и скулптор з Вербасу Милорад Правуляц, член „Карпатох”, котрому на ютре на Фестивалє будзе отворена вистава його подобових роботох. На отвераню вистави шпива и спомнута ґрупа КПД, а главни наступ на Фестивале, на отвореней сцени у Свиднїку, Шпивацка ґрупа „Карпатох” будзе мац на соботу, 27. мая. До побратименого Свиднїку одходзи и делеґация Општини Вербас, на чолє з предсидательом Општини Миланом Ґлушцом.

На Русинским фестивалє того року перши раз орґанизовани и вибор за найкрасшу Русинку – „Мис Русинка”, за хтори ше поприявйовали дзивки зоз жемох у котрих жию Русини/Руснаци, а финални вибор Мис Русинки будзе на соботу, 27. мая.

Медзи кандидатками за найкрасшу Русинку и три дзивки зоз Сербиї – Яна Еделински з Руского Керестура, Мария Хромиш з Дюрдьова и Силвия Сокол з Бикичу. Була приявена и Анастазия Роман з Керестура, алє пре обовязки на факултету нє може участвовац у финалним виборе.

Одход на Фестивал до Свиднїку орґанизує и Роботне цело за младеж Националного совиту Руснацох, так же 14-еро млади з наших местох до Словацкей рушаю на ютре, а госци Фестивалу и городоначалнїка Свиднїку Яна Голодняка буду и представителє НС Руснацох, як и други особи з нашей заєднїци.

Главни орґанизатор Фестивалу русинскей култури Окружна орґанизация Русинскей оброди Словацкей за Свиднїк, а соорґанизаторе Место Свиднїк и свиднїцки Поддуклянски образовни центер.

Фестивал ше отримує под покровительством предсидателя Словацкей Републики Андрея Киску, а з финансийну потримовку Уряду Влади Словацкей, з Програми за културу народносних меншинох.

 

 

ПОВЯЗАНИ ТЕКСТИ