РУСКИ КЕРЕСТУР − Дванасти по шоре Медзинародни волонтерски камп у Руским Керестуре почал пондзелок 23. юлия кед домашнї 13-еро волонтере дочекали госцох, троїх зоз Мексика з Южней Америки и по єдно зоз Ирскей, Турскей и Русиї, а будзе тирвац по 4. авґуст.
Лидер тогорочного кампу млади атлетичар Деян Будински зоз валалу, а колидер Вук Вуїчич зоз Беоґраду. Вони двоме задлужени за план и програму роботи у кампу, як и за отримованє позитивней атмосфери.
Пондзелок, нултого дня, волонтере ше поупознавали на мултикултуралним вечару, кед окрем себе, своїм парняком мали нагоду представиц и свою културу. До тераз волонтером презентовани Руски Керестур и Сербия, нащивели Водицу, а зоз Здруженьом женох „Байка” вчера пред вечаром правели домашнї галушки.
З роботами почали такой вовторок. Перше було заплановане фарбенє огради на Катедралней церкви св. оца Миколая. Волонтере перше пририхтали ограду за фарбенє так же ю ошмирґлали, а у истей роботи им помогли и члени Церковного одбору, котри швайзовали часци огради дзе то було потребне.
З роботним планом у волонтерским кампу предвидзене же ше на исти способ офарби ограда и на будинку Замку, потим єден дзень видвоя за пораєнє двора коло найстаршех хижи у валалє, дзе у цеку єй адаптованє и конзервованє.
Як єден з векших задаткох кампу то буду и роботи на базену, дзе заплановане направиц терен за одбойку на писку, а на концу кампу, лидере обдумали орґанизовац турнир у одбойки по правилох два на два. На турнир поволани шицки котри заинтересовани участвовац, а треба же би ше явели орґанизатором.
Же би камп нє бул лєм орґанизована робота, за шицких волонтерох предвидзени и рижни активносци за розвагу. Нєшка нащивя Дом култури Руски Керестур, дзе им будзе презентована руска ношня, а по традициї вони ю годни и пробовац. Буду мац нагоду чуц и шпивац руски и сербски народни шпиванки, ту и нєдзельова ексурзия, як и правенє капущанїкох и воженє на коньох по валалє у парадних запрагох у сотруднїцтве зоз Конїцким клубом „Русин”.
Орґанизаторе и тогорочного кампу Туристичне здруженє Руски Керетстур и орґанизация Млади виглєдоваче Сербиї по проєкту „Млади су закон”. Домашня им Любица Няради котра медзи иншим задлужена за цалосне костиранє, векшину активносцох окончую у просторийох Каритасу, а змесцени су у Спортскей гали.
Отримованє кампу потримали числени приватни поднїмателє, здруженя, орґанизациї и гражданє Руского Керестура. Кед же дахто жада помогнуц и потримац роботу волонтерох може и у цеку кампу на гоч яки способ, а треба мац у оглядзе же шицко робя на хасен валалу.
