Того викенду Бардейовски саям

автор влп
1k Опатрене

БАРДЕЙОВ (СЛОВАЦКА) – Нєшка, у словацким городзе Бардейов, почнє 46. медзинародни Бардейовски саям.

На площи велькей 4 800 квадратни метери свойо продукти буду викладац вецей як 500 продукователє и тарґовци роби широкого трошеня и вина. На спомнутим Сайму того року будзе учествовац и седемчлена делеґация зоз братского городу, Сримских Карловцох, першираз зоз широким понукнуцом винох своїх продуковательох.

Делеґацию будзе предводзиц Деян Манойлович, директор Туристичней орґанизациї зоз Сримских Карловцох, хтора представи туристичне понуканє того городу зоз Сербиї. То насампредз вина хтори ше продукує у Сримских Карловцох, а хтори жителє Бардейова и госци на Сайме буду мац нагоду и коштовац.

На Сайме буду и рижни конференциї и округли столи на велї теми зоз обласци туризма и поднїмательства. За штири днї тирваня Сайма буду и богати културни програми рижних жанрох музики, наступя числени фолклорни ансамбли, музични ґрупи, як зоз Словацкей так и зоз иножемства.

Саям ше закончує на нєдзелю вечар, кед ше делеґациї городох побратимох и нащивителє розиду по нове стретнуце на Бардейовским сайме.

jarmok_hist_9

ПОВЯЗАНИ ТЕКСТИ