ПЕТРОВЦИ (ГОРВАТСКА) – Од пиятку, 2. юния, та по нєдзелю, 4. юний, у Петровцох будзе тогорочна 44. найвекша манифестация култури Руснацох у Горватскей „Петровски дзвон”, хтору орґанизую Союз Русинох Републики Горватскей (РГ) и домашнє КУД „Яким Гарди”, а под покровительством Совиту за национални меншини РГ.
„Петровски дзвон” того року будзе отримани у знаку 90-рочнїци народзеня учительки Вири Гудаковей, 240-рочнїци снованя Крижевского владичества и 40-рочнїци шмерци др Федора Лабоша.
Манифестация на пияток вечар почнє з приказом звичаю рубаня майского древка у петровскей Етноґрафскей збирки, на соботу будзе промоция трох кнїжкох и Литературно-музични вечар Руснацох у Горватскей, а на нєдзелю, 4. юния пополадню и вечар буду централни манифестациї – „Петровски дзвончок” и „Петровски дзвон”, на хторих наступя танєчно-музични ансамбли руских културно-уметнїцких дружтвох у Горватскей и госци.
На „Петровским дзвонє” на нєдзелю, 4. юния, цаловечарши концерт отрима музични ансамбл Дому култури Руски Керестур.
Културна манифестация „Петровски дзвон” будзе отримана з финансийну потримовку Вуковарско-сримскей жупаниї и Општини Боґдановци.