РУСКИ КЕРЕСТУР – Тогорочни 49. Драмски мемориял Петра Ризнича Дядї у Руским Керестуре почнє тей соботи, 18. марца, а будзе закончени на нєдзелю, 26. марца. Як и дотераз, орґанизатор Мемориялу керестурски Дом култури, а шицки представи буду виведзени на сцени у Велькей сали Дому култури.
На Мемориялє участвую осем представи – пейсц за старших и три дзецински, а на соботу почнє з отвераньом вистави малюнкох у енкаустики Сонї Папуґа Андєлич и премиєрним виводзеньом представи „Зазбероваче труплох” нашого националного театру „Петро Ризнич Дядя”.
На смотри театралней творчосци Руснацох на тих просторох по руски, односно з наших местох, участвую ище два представи за старших – Драмского студия АРТ Дому култури Руски Керестур и Драмскей секциї КУД „Яким Гарди” з Петровцох, з Горватскей, як и два дзецински – тиж Драмского студия АРТ керестурского Дому култури, та Руского КУД „Др Гавриїл Костельник” з Кули.
Як госци на Мемориялє участвую КУД „Иван Сенюк” з Кули, чия дзецинска ґрупа одбави представу по українски, потим „Театер при фонтани” з Михаловцох, зоз Словацкей, з комедию „по виходнярски”, а Мемориял на нєдзелю, 26. марца, завру драмски аматере Театру „Стеван Сремац” з Червинки.
Домашнї Драмски студио АРТ свою дзецинску представу на Мемориялє одбави два раз – и за школярох з наших местох котри до Керестура приду у орґанизациї Одбору за образованє Националного совиту Руснацох.
Драмски мемориял Петра Ризнича Дядї отримує ше з финансийну потримовку Министерства култури и информованя Републики Сербиї, Покраїнского секретарияту за културу, явне информованє и одношеня з вирскима заєднїцами, Покраїнского секретарияту за образованє, предписаня, управу и национални меншини-национални заєднїци, Општини Кула и Националного совиту Руснацох.