ШИД – Вчера, 19. авґуста, на швето Преображеня Господнього, церква и вирни у Шидзе преславели храмове швето Кирбай.
Архиєрейску Службу Божу предводзел апостолски еґзарх за грекокатолїкох у Сербиї кир Георгий Джуджар, а сослужели ище седемцме паноцове зоз нашого еґзархату, крижевского владичества, як и римокатолїцки паноцец зоз Шиду.
У казанї преосвящени владика визначел значносц Хистового преображеня на гори Тавор з порученьом же кажди вирни треба же би преображел свой живот и ишол по християнскей драги.
По традициї, на тото швето пошвецена овоц, насампредз грозно, хтору потим вирни мали нагоду коштовац на виходзе зоз церкви.
Преосвящени владика повинчовал домашньому парохови и деканови сримскому о. Михайлови Режакови 25. рочнїцу священїческого поволаня, а о. Режак вирним з тей нагоди подзелєл обращики.
На Служби Божей були и Желько Ковач, предсидатель Вивершного одбору Националного совиту Руснацох, Наташа Еделински Миколка, подпредсидателька Националного совиту, як и госци зоз других наших местох и парохийох.
